KURU KA JANM ( कुरु का जन्म ) full story


kuruvansh ke pratham purush ka naam kuru tha| kuru bade prataapee aur bade tejasvee the| unheen ke naam par kuruvansh kee shaakhaen nikaleen aur vikasit hueen| ek se ek prataapee aur tejasvee veer kuruvansh mein paida ho chuke hain| paandavon aur kauravon ne bhee kuruvansh mein hee janm dhaaran kiya tha| mahaabhaarat ka yuddh bhee kuruvanshiyon mein hee hua tha| kintu kuru kaun the aur unaka janm kisake dvaara aur kaise hua tha - vedavyaas jee ne is par mahaabhaarat mein prakaash mein prakaash daala hai| ham yahaan sankshep mein us katha ko saamane rakh rahe hain| katha badee rochak aur preranaadaayinee hai|


ati praacheen kaal mein hastinaapur mein ek prataapee raaja raajy karata tha| us raaja ka naam savaran tha| vah soory ke samaan tejavaan tha aur praja ka bada paalak tha| svayan kasht utha leta tha, par praan dekar bhee praja ke kashton ko door karata tha|


savaran sooryadev ka anany bhakt tha| vah pratidin badee hee shraddha ke saath sooryadev kee upaasana kiya karata tha| jab tak sooryadev kee upaasana nahin kar leta tha, jal ka ek ghoont bhee kanth ke neeche nahin utaarata tha|


ek din savaran ek parvat par aakhet ke lie gaya| jab vah haath mein dhanush-baan lekar parvat ke oopar aakhet ke lie bhraman kar raha tha, to use ek ateev sundar yuvatee dikhaee padee| vah yuvatee sundarata ke saanche mein dhalee huee thee| usake pratyek ang ko vidhaata ne badee hee ruchi ke saath sanvaar-sanvaar kar banaaya tha| savaran ne aaj tak aisee stree dekhane kee kaun kahe, kalpana tak nahin kee thee| savaran stree par aakst ho gaya, sabakuchh bhoolakar apane aapako us par nichhaavar kar diya| vah usake paas jaakar, trshit netron se usakee or dekhata hua bola, "tanvangee, tum kaun ho? tum devee ho, gandharv ho ya kinnaree ho? tumhen dekhakar mera chit chanchal ho utha| tum mere saath gandharv vivaah karake sukhopabhog karo|"


par yuvatee ne savaran kee baaton ka kuchh bhee uttar nahin diya| vah kuchh kshanon tak savaran kee or dekhatee rahee, phir adrshy ho gaee| yuvatee ke adrshy ho jaane par savaran atyadhik aakul ho gaya| vah dhanush-baan phenkakar unmaton kee bhaanti vilaap karane laga, "sundaree ! tum kahaan chalee gaeen? jis prakaar soory ke bina kamal murajha jaata hai aur jis prakaar paanee ke bina paudha sookh jaata hai, usee prakaar tumhaare bina main jeevit nahin rah sakata| tumhaare saundary ne mere man ko chura liya hai| tum prakat hokar mujhe batao ki tum kaun ho aur main tumhen kis prakaar pa sakata hoon?"


yuvatee pun: prakat huee| vah savaran kee or dekhatee huee bolee, "raajan ! main svayan aap par mugdh hoon, par main apane pita kee aagya ke vash mein hoon| main sooryadev kee chhotee putree hoon| mera naam taptee hai| jab tak mere pita aagya nahin denge, main aapake saath vivaah nahin kar sakatee| yadi aapako mujhe paana hai to mere pita ko prasann keejie|" yuvatee apane kathan ko samaapt karatee huee pun: adrshy ho gaee| savaran pun: unmatton kee bhaanti vilaap karane laga| vah aakulit hokar prthvee par gir pada aur taptee-taptee kee pukaar se parvat ko dhvanit karane laga| savaran taptee ko pukaarate-pukaarate dharatee par gir pada aur behosh ho gaya| jab use hosh aaya, to pun: taptee yaad aaee, aur yaad aaya usaka kathan - yadi mujhe paana chaahate hain, to mere pita sooryadev ko prasann keejie| unakee aagya ke bina main aapase vivaah nahin kar sakatee|


savaran kee ragon mein vidyut kee tarang-see daud uthee| vah man hee man sochata raha, vah taptee ko paane ke lie sooryadev kee aaraadhana karega| unhen prasann karane mein sabakuchh bhool jaega| savaran sooryadev kee aaraadhana karane laga| dheere-dheere saalon beet gae, savaran tap karata raha| aakhir sooryadev ke man mein savaran kee pareeksha lene ka vichaar utpann hua|


 kuru ka janm ( कुरु वंश का जन्म ) full story... CONTINUE.. 



raat ka samay tha| chaaron or sannaata chhaaya hua tha| savaran aankhen band kie hue dhyaanamagn baitha tha| sahasa usake kaanon mein kisee kee aavaaj padee, "savaran, too yahaan tap mein sanlagn hai| teree raajadhaanee aag mein jal rahee hai|"


savaran phir bhee chupachaap apanee jagah par baitha raha| usake man mein ranchamaatr bhee dukh paida nahin hua| usake kaanon mein pun: doosaree aavaaj padee, "savaran, tere kutumb ke sabhee log aag mein jalakar mar gae|" kintu phir bhee vah himaalay-sa drdh hokar apanee jagah par baitha raha, usake kaanon mein pun: teesaree baar kanth-svar pada, " savaran, teree praja akaal kee aag mein jalakar bhasm ho rahee hai| tere naam ko sunakar log thoo-thoo kar rahe hain|" phir bhee vah drdhataapoorvak tap mein laga raha| usakee drdhata par sooryadev prasann ho uthe aur unhonne prakat hokar kaha, "savaran, main tumhaaree drdhata par mugdh hoon| bolo, tumhen kya chaahie?"


savaran sooryadev ko pranaam karata hua bola, "dev ! mujhe aapakee putree taptee ko chhodakar aur kuchh nahin chaahie| krpa karake mujhe taptee ko dekar mere jeevan ko krtaarth keejie|"


sooryadev ne prasannata kee mudra mein uttar diya, "savaran, main sabakuchh jaanata hoon| taptee bhee tumase prem karatee hai| taptee tumhaaree hai|"


sooryadev ne apanee putree taptee ka savaran ke saath vidhivat vivaah kar diya| savaran taptee ko lekar usee parvat par rahane laga| aur raag-rang mein apanee praja ko bhee bhool gaya|


udhar savaran ke raajy mein bheeshan akaal paida hua| dharatee sookh gaee, kuen, taalaab aur ped-paudhe bhee sukh gae| praja bhookhon marane lagee| log raajy ko chhodakar doosare deshon mein jaane lage| kisee desh ka raaja jab raag rang mein doob jaata hai, to usakee praja ka yahee haal hota hai|


savaran ka mantree bada buddhimaan aur udaar hrday ka tha| vah savaran ka pata lagaane ke lie nikala| vah ghoomata-ghaamata usee parvat par pahuncha, jis par savaran taptee ke saath nivaas karata tha| savaran ke saath taptee ko dekhakar buddhimaan mantree samajh gaya ki usaka raaja stree ke saundary jaal mein phansa hua hai| mantree ne badee hee buddhimaanee ke saath kaam kiya| usane savaran ko vaasana ke jaal se chhudaane ke lie akaal kee aag mein jalate hue manushyon ke chitr banavae| vah un chitron ko lekar savaran ke saamane upasthit hua| usane savaran se kaha, "mahaaraaj ! main aapako chitron kee ek pustak bhent karana chaahata hoon|"


mantree ne chitron kee vah pustak savaran kee or badha dee| savaran pustak ke panne ulat-palat kar dekhane laga| kisee panne mein manushy pedon kee pattiyaan kha rahe the, kisee panne mein maataen apane bachchon ko kuen mein phenk rahee theen| kisee panne mein bhookhe manushy jaanavaron ko kachcha maans kha rahe the| aur kisee panne mein pyaase manushy haathon mein keechad lekar chaat rahe the| savaran chitron ko dekhakar gambheerata ke saath bola, "yah kis raaja ke raajy kee praja ka drshy hai?"


mantree ne bahut hee dheeme aur prabhaavapoorvak svar mein uttar diya, "us raaja ka naam savaran hai|"


yah sunakar savaran chakit ho utha| vah vismay bharee drshti se mantree kee or dekhane laga| mantree pun: apane dhang se bola, "main sach kah raha hoon mahaaraaj ! yah aapakee hee praja ka drshy hai| praja bhookhon mar rahee hai| chaaron or haahaakaar macha hai| raajy mein na ann hai, na paanee hai| dharatee kee chhaatee phat gaee hai| mahaaraaj, vrksh bhee aapako pukaarate-pukaarate sookh gae hain|"


yah sunakar savaran ka hrday kaamp utha| vah uthakar khada ho gaya aur bola, "meree praja ka yah haal hai aur main yahaan mad mein pada hua hoon| mujhe dhikkaar hai| mantree jee ! main aapaka krtagy hoon, aapane mujhe jagaakar bahut achchha kiya|"


savaran taptee ke saath apanee raajadhaanee pahuncha| usake raajadhaanee mein pahunchate hee joron kee varsha huee| sookhee huee prthvee hariyaalee se dhak gaee| akaal door ho gaya| praja sukh aur shaanti ke saath jeevan vyateet karane lagee| vah savaran ko paramaatma aur taptee ko devee maanakar donon kee pooja karane lagee| savaran aur taptee se hee kuru ka janm hua tha| kuru bhee apane maata-pita ke samaan hee prataapee aur punyaatma the| yugon beet gae hain, kintu aaj bhee ghar-ghar mein kuru ka naam goonj raha hai|